لايهمك من الدنيا هموم

واهني الصخرة اللي ما يحرقها سمـوم
الزمان اللـي يهـد العـزم مـا هدهـا

الزمان اللـي تحـدى قوييـن العـزوم
لين مشاها علـى ود مـا هـو ودهـا

والمجامل بعض الأحيان ما يقضي لزوم
لابو النفـس الضعيفـة ولابـو جدهـا

مير تجبرنا العوايـد وتجبرنـا السلـوم
نكتـم الاسـرار ياليـن تاصـل حدهـا

الردى لا طاح جعلـه يطيـح ولايقـوم
باح سـده والنشامـى ماباحـت سدهـا

كل ما كبرت وضاقت على عيال الرخوم
نحتزم لأكبـر مصيبـة وناطـا خدهـا

جعل قسمي عند ربي من خيار القسـوم
واحـدٍ يعـط العطـايـا ولا يرتـدهـا

يا عيـال آدم وحـواء تراهـا ماتـدوم
دورة الأيــام لا بـدهـا لا بـدهــا

يا وليد البط وشلون مـا تقـدر تعـوم
وأنت أبوك يعوم جزر البحـور ومدهـا

وأنت يا حلمٍ حلمته ما هو مثل الحلـوم
ياضحية مزح الأحـلام مـادري جدهـا

أدري إن فالناس معطى وفالناس محروم
هيه يا بيـض النوايـا ويـا مسودهـا

يا ضميري لا يهمك من الدنيـا همـوم
الصعيبـة حِلْهَـا والبسيطـة عـدهـا

جات في شد الشوارب وفي قرب الخشوم
كبر الضيفه وعش الضيـوف وغدهـا

والمراجـل ماتوفـى بضافيـة الهـدوم
كود بسيوفٍ يشـوق النواظـر حدهـا

والردي لو دَرَس المرجلة في كـل يـوم
المراجـل عنـد أهلهـا يذعـذع ندهـا

يعتبر قسمه مثل قسـم زاهيـة الرقـوم
يوم تكحـل عينهـا والقـرون تكدهـا

ماكسبت الا رضا اهل النمايـم والعلـوم
يا رسول الحكي هات العلـوم و ودهـا

الصفوف اثنين هـذا دفـاع وذا هجـوم
وأنت أظنك لا أنت معها ولا أنت بضدها

شرهة الطيب تعـداك للغـوج العـزوم
وانت صلفات المشاريـه مانـت بقدهـا

مير في سود الأظلـة تريـح ومخـدوم
وإن ذبحك الجوع كِـدْ التكاسـي كِدْهَـا

جزاك الله خير فعلا رااااااااااااااائعه

مشكور يامعالي السفير على كرم المرور وجميل الرد
وهذا من ذوقك